"cerpen"

CINTA BERSEMI DI KOTA KUPANG

       Beta  nama Desi. Beta tinggal di Kupang  dan merupakan salah satu Mahasiswa STIPAS KAK yang sekarang su semester 9.

      Itu pagi pas hari Senin, beta ada sementara tunggu bemo di pinggir jalan juh son lama ada satu kakak nyong datang berenti di beta punk depan dia  suruh beta naik deng dia, padahal beta son kenal dia nih. Mah karena Buru-buru beta langsung pi naik deng dia su mah. Dalam perjalanan katong dua bacerita trus beta tanya dia punk  nama "kakak nama sapa?" dia langsung jawab dengan lengkap "Ade kakak punya nama Riko asal dari Malaka dan sekarang tinggal di Kupang". Dia juga ternyata  mahasiswa STIPAS KAK semester 9 sama deng beta juh. Hanya karena son akrab makanya beta son kenal dia. Pas sampe di Kampus beta turun dari motor beta minta makasih dan katong dua bapisah di parkiran situ.

    Pas Beta liat  jam begini su jam 11.00 WITA, beta langsung pulang dan pas beta jalan  sampe di parkiran begini son sengaja beta ketemu tambah itu laki-laki. Dia tawar beta ko pulang sama-sama deng dia. Beta dalam hati bilang "dari pada  beta buang-buang uang bemo lebae beta pulang sa deng dia”. Juh pas sampe  begini dia minta beta punya nomor, sonde pikir panjang beta langsung kasih su mah.

     Pas beta ada mo tidor begini, son  lama beta dengar Hp bunyi dan beta lia begini ternyata Riko yang telpon, Beta angkat HP dan baomong deng dia. Dia ajak beta jalan-jalan pi alun-alun Kota Kupang . Karena  son sibuk beta mau su mah. Son lama su agak gelap sedikit beta dengar ada motor yang badiri di depan rumah. Pas beta pi lia begini ternyata Riko yang datang. Beta son sempat suruh dia duduk juh katong dua langsung jalan. Pas sampe begini katong dua duduk bacerita sambil baketawa son jelas bar itu malam juh angin  punk kencang nih bikin beta sampe takut. 

Je beta kastau dia  “awii Riko angin punk kencang le beta ke takut haa” juh de balas 

“son apa-apa ada beta disini juh”. 

Son lama de tanya beta begni "Desi Lu ada pacaran deng sapa sekarang" 

juh beta balas "untuk sekarang nih beta sonde  pacaran deng sapa-sapa, ko kenapa?” 

juh de bilang “Desi beta mo omong sesuatu" 

juh beta bilang “Apa" 

dia bilang "beta bisa titip b punk hati di lu ko?” 

beta bingung dan beta tanya “maksudnya apa?” 

juh de bilang “beta suka  deng Lu, lu mau ko sonde pacaran deng beta” 

beta kaget su mah beta langsung ketawa bar bilang “Hadehhh Riko ee masa katong bar akrab juh lu su suka deng beta nih” 

juh dia bilang “memang Katong bar kenal mah beta rasa Lu nih beda deng perempuan semua  yang beta kenal beta ke nyaman dekat dengan Lu, kalo soal bakenal lebih dalam kan katong dua bisa jalani sa dolo" 

juh tanpa pikir panjang b langsung bilang “iyah beta mau  dan soal lain-lain nanti katong  jalani sa dolo”. 

Jadi itu malam tu katong dua su jadian dan Alun-alun kota Kupang yang jadi saksi katong dua punk kisah. mulai itu saat juh mau pi mana-mana atau mau buat apa-apa katong dua selalu sama-sama dan saling babantu.

     Karena katong su semester 9 adalah semester yang super sibuk untuk urus ujian skripsi, jadi tiap hari katong dua hanya kerja ini skripsi sampe habis dan ais itu juh katong dua iko ujian.  tanggal 25 Oktober 2020 adalah waktu yang katong tunggu-tunggu untuk wisuda dan b talalu senang karna katong dua dapat nilai IPK paling bae.

   Ais wisuda juh katong dua bajanji kalo su dapa pekerjaan katong dua mau jalani hubungan yang lebih serius.. Setelah itu semua tercapai Katong dua rencana untuk bangun keluarga. Je pas di tanggal 30 Juli 2021 katong dua dikukuhkan dalam pernikahan kudus. Katong dua bajanji untuk sehidup semati dan bahagia selamanya dengan katong punk keluarga kecil.

     Dari  ini kisah ada makna yang mendalam yaitu bahwa sebuah cinta datang tiba-tiba dan merupakan kesan indah yang sayang apabila dilewatkan tanpa kata-kata indah.

Sekian...